Sobre nós

Logo Compostela Ilustrada

O Encontro Internacional de Cadernos de Viaxe Compostela Ilustrada, nace no ano 2016 da man de El Patito Editorial e Miguelanxo Prado, como un salón de inverno para cadernistas na cidade de Santiago. O obxectivo que persegue este evento é traer os mellores profesionais desta arte, durante a segunda fin de semana do mes de novembro, para compartir as súas experiencias a través de conferencias, exposicións e xornadas de debuxo en vivo cos asistentes. Desde o primeiro ano conseguimos que se desprazasen á nosa cidade 200 participantes chegados cos seus cadernos, lapis e acuarelas, desde todos os recunchos da Península Ibérica.

Na primeira edición, 2016, a temática foi o encontro en si mesmo, foi a edición de presentación e, en certa maneira, laboratorio de experimentación de acertos e erros. Na edición de 2017, a temática elixida foron os Camiños a Santiago, e todo o evento virou arredor delles a través de exposicións, charlas, lugares para debuxar… Nesta terceira edición, 2018, apostamos pola Natureza Urbana, os parques e xardíns que rodean a cidade; e esta cuarta edición, 2019, adicarémola á Arquitectura Contemporánea.

Turismo, cultura e arte mestúranse en Compostela Ilustrada, porque estas tres pezas son as claves deste encontro, que busca descubrir e promover unha cidade diferente. Os movementos de debuxantes urbanos están cada día máis en auxe e as grandes cidades xa se están afacendo a ver grupos de xente na rúa retratando o que ven, porque aquí o bo non é a monumentalidade dun debuxo senón o momento que reflicte.

 

Gemma Sesar
Organizadora de Compostela Ilustrada